नेपाली काङ्ग्रेसले भन्यो बहुमत गुमाएका मुख्यमन्त्रीलाई पुनः मुख्यमन्त्री नियुक्त गर्नु संविधानमाथिको ठाडो उल्लंघन

 

काठमाडौँ / नेपाली काङ्ग्रेसका सभापति शेरबहादुर देउवाले बहुमत गुमाएका मुख्यमन्त्रीलाई पुनः मुख्यमन्त्रीमा नियुक्त गर्नु संविधानमाथिको ठाडो उल्लंघन भएको बताउनु भएको छ ।

सभापति देउवाले आइतबार आज प्रेस विज्ञप्ती जारी गर्दै लुम्बिनी प्रदेशमा आज भएको घटनाक्रमलाई गम्भीरतापूर्वक लिएको भन्दै संविधानको ठाडो उल्लंघन, बलमिच्याईं र घोर अलोकतान्त्रिक प्रवृत्तिको कडा निन्दा र भत्सर्ना गरेका हुन् ।

मुख्यमन्त्रीले बहुमत गुमाइसकेको अवस्थामा अविश्वासको प्रस्ताव छलेको र उनैसँग बहुमत छ भनेर मान्दै फेरि मुख्यमन्त्री बनाइनु तर्कसंगत नभएको बताएका छन् ।

सभापति देउवाले जारी गरेको विज्ञप्तिमा भनिएको छ,‘नेकपा एमालेले प्रदेश सभामा प्रष्ट बहुमत गुमाएको तथ्य बुझेर नै अविश्वास प्रस्ताव छलेका मुख्यमन्त्रीसँग बहुमत छ भनेर मान्नु र पुनः मुख्य मन्त्री नियुक्ति गरिनु राजनैतिक, नैतिक र संवैधानिक कुनै पनि कोणबाट तर्कसंगत छैन ।’

एमालेबाट निर्वाचित सांसदले राजीनामा गरिसकेको र विपक्षमा रहेका दलले वैकल्पिक मुख्यमन्त्रीको प्रस्ताव गरेको अवस्थामा मुख्यमन्त्रीलाई सपथ दिलाइनु लज्जास्पद भएको टिप्पणी समेत सभापति देउवाले गरेका छन् ।

‘संविधान बमोजिम संसदमा अविश्वास प्रस्तावको प्रक्रिया अघि बढेको अवस्थामा त्यसलाई निष्कर्षमा नपुर्‍याई राजीनामाको नाटक गर्नु र प्रदेश अधिवेशन अन्त्य गर्नु नेपालको संविधान एवं संसदीय मुल्य–मान्यता, विधि र पद्धतिको ठाडो उल्लंघन हो,’ सभापति देउवाले जारी गरेको विज्ञप्तिमा भनिएको छ ।

सभापति देउवाले केन्द्रमा देखिएको अधिनायकवादी चरित्रको अर्को संस्करण लुम्बिनी प्रदेशमा प्रस्तुत भएको भन्दै संसदको बहुमतअनुरुप अर्को सरकार गठनको बाटो खोल्न समेत माग गरेका छन् ।

‘बलमिच्याईंले मिचिएको विधि र प्रक्रियालाई अविलम्ब सुचारू गरेर संसदको बहुमत अनुरुप नयाँ सरकारका लागि मार्गप्रशस्त गर्न म चेतावनी सहित अपिल गर्दछु,’ देउवाले जारी गरेको विज्ञप्तिमा भनिएको छ ।

 

 

 

 

तपाईको प्रतिक्रिया

सम्बन्धित समाचार